哥哥陳皮今天又大哭了。

他待在浴室的洗澡時間太耐，弟弟等得又眼瞓又肚餓，今晚實在沒辦法安排他們同時入睡。

我對陳皮說：「你可以現在起身嗎？弟弟好肚餓要飲奶睡覺了。」陳皮不願意，但又想我陪他。

「如果你唔而家起身，我就要先喺房埋身餵弟弟飲奶。」考慮了幾分鐘，拉拉扯扯，最後我決定讓他自己繼續沖涼，我去房間餵奶。

才兩三分鐘。在房間的我已經聽到來自浴室陳皮的叫喊。「媽媽媽媽媽媽媽媽媽媽媽媽……你過嚟啦你過嚟啦你過嚟啦……」

弟弟已閉上眼睛喝奶，生怕吵醒弟弟的我，對於哥哥的叫喊十分無奈。想不到法子，只好暫時不回應陳皮。

結果就是過了幾分鐘後，陳皮勁大聲爆喊。我忍不住了，大聲回應他：「我餵緊弟弟唔得閒過嚟睇你住。」

之後，最差的結果發生了，弟弟掙開眼，哥哥連毛巾也沒拿，全身濕透的從浴缸跑出來客廳，兩個都爆喊。我繼續不再回應哥哥，先安撫六個多月的弟弟喝好奶、穿好睡袋上床睡覺，才去看看心碎的哥哥。

我問：「你喊係唔係因為覺得好委屈？做哥哥好辛苦，次次都要等弟弟被照顧好媽媽先搵你？」

陳皮好像被人撳了總掣咁點頭同爆喊。

「真係辛苦啦，我細個都係咁。我都係大姐姐，婆婆要照顧三個妹妹一個弟弟，很多時候我需要媽媽，媽媽也不可以第一時間回應我。真的很傷心呢！」陳皮突然覺得我明白了他，便在我懷抱中哭上一兩分鐘，就沒事了，蹦蹦跳跳又去畫畫。

終於，到了關燈睡覺的時間，陳皮主動對天父說：「有時我好羨慕弟弟成日都有媽媽抱，有時我好想變返零歲，但係弟弟又有時好羨慕我喎，我有得食咁多好食嘅嘢，有得去咁多地方玩，識玩咁多玩具同埋棋，弟弟一定超級羨慕。哈哈哈。」

我們沒可能事事處理得很完美，孩子也注定在生命中會經歷很多失望難過的時刻。但小朋友心結好容易解，只要媽媽花時間愛他、同理他的心情，他一定也是一個幸福的孩子。