以下純屬個人建議及分享，希望集思廣益，並無牽涉任何私人利益。有唔明亦可以隨便查詢。建議想開始學玩穿越機嘅朋友, 可以先由參加一些穿越機練習嘅聚會開始，了解下呢樣係乜嘢嘅運動。由於練習需要時間，所以睇一睇自己鍾唔鍾意先至好決定買，雖然你會覺得呢樣係一個玩具，但我亦希望玩家注意飛行安全，千祈唔好以為佢機仔細細就可以亂嚟！

新手第1部

可以先買一個合適嘅遙控器例如 Frsky X9D+ (HK$1400) 或者係 Jumper T12(HKD620)，兩者都係2019年唔錯嘅選擇。 喺電腦下載一個模擬器，最平嘅喺Steam下載“FLY AIR 2”只需要HK$28，高級啲嘅有另外一隻叫”Liftoff”(HK$119)。又或者可以下載“Rotorrush”，有免費試玩版畀你學習一下基本嘅操縱。

如果呢一步覺得太難操縱，又或者睇過第一身畫面依然覺得太暈, 可以轉手賣番嗰遙控，最多打個八折。

新手第2部

玩完模擬器之後覺得好正，可以操控到嘅話，不妨考慮買細機開始，而家選擇非常之多，可以有幾個套裝機嘅牌子選擇。

1. Emax Baby Hawk RTF (HK$1300).

抵買套裝有飛機遙控眼鏡，不過修理起上嚟就比較麻煩，亦只可以用專用配件。不過外型同坊間其他機比較特別，感覺上唔似一百蚊嗰啲玩具機，相對自我感覺良好。

2. Happymodel Mobula 7 (HK$700)

最近飛落幾爽嘅一部機，有特價可以考慮買多部，維修亦算方便，因為外形大眾化，容易轉配件，平價而有速度感的選擇。

3. Betafpv 65, 75, 75X, Pro (HK600-HK1200)

有刷無刷，動力大小任君選擇，不過呢個牌子越做越貴，配件多，選擇亦可以隨意更改，非常熱門嘅選擇。

空心杯同無刷建議：直接買無刷嘅摩打牌子，空心杯的摩打壽命相對比較短，不太建議新手現在接觸……除非好平，建議買定五六粒電池、充電器同埋士啤螺旋槳。

電池牌子 : GNB、花牌Infinity、Betafpv

充電器牌子：TBS、Betafpv、ISDT、1S-2S充電器（最好買有USB充電，起碼可以用「尿袋」)

眼鏡方面有平有貴，如果唔知道自己會唔會長玩落去，可以買個平啲嘅眼鏡或者搵相熟嘅朋友借。最近有隻叫Topsky Prime 1S（HK$800）的眼鏡，外型模仿專業眼鏡，價錢亦算合理，由於有錄影功能，可以一試。佢同淘寶其他500-600蚊嗰啲畫質都差唔多。記住穿越機注重嘅係畫面傳輸嘅實時性，千祈唔好對睇嘅畫面有要求，唔係話冇高清，不過唔係入門嘅事，如果已經下定決心，亦都有兩個大牌子可以選擇：

1. Skyzone 03 （HK$3200）

買多粒電已經用得，唔使好似其他牌子又要買接收，又要買天線買呢買囉，質素亦絕對有保證，唔使煩upgrade接收，因為冇得upgrade. 不過建議換咗對天線佢。

2. Fatshark HDO肥鯊 + Rapidfire接收（HK$49XX）

需要另外考慮買接收、天線，現在坊間有四大接收選擇有Crossfire、TrueD V3、Laforge V4及rapidFIRE 5.8GHz，相對比較建議rapidFIRE，有興趣想知有乜嘢分別，facebook、youtube或本地有好多用家可以畀你意見。

坊間有一隻非常多人用嘅天線，效果令接收收得咁清楚，建議貴啲都要買，因為一對天線用到老，VAS Crosshair一菇一版（HK$400）。

去到第二部最多人覺得卻步嘅就係眼鏡。平有平玩，貴有貴玩，亦可以留意下二手市場。不過通常開始掌握到嘅玩家，會比較願意買好一點的器材。記住器材係死嘅，穿越機重要嘅係個人技術，買飛機唔包技術，唔係越貴就飛得越好。

新手第3部

玩完細機之後，碰碰撞撞一定會有，所以建議開始買一啲維修工具或嘗試砌大機。砌大機嘅話，需要零件例如摩打、機架、螺旋槳、電池、「辣雞」、飛控、螺絲、熱縮通、螺絲批（刪下50字）等等，聽落一堆好複雜嘅嘢，不過以我所見， 新手在有人幫助的情況下，四、五小時已經可以自組一台競速機。不過，往後修復就要靠日積月累嘅經驗，修理、飛行、 安裝都係玩穿越機嘅一個樂趣，有乜唔明嘅可以直接喺群組或係加入我哋嘅Whatsapp群組提問。

完成咗新手三部曲，就可以繼續諗下會唔會去飛手三部曲進發啦！好多人會問「 究竟你哋喺邊度飛？」其實香港official可以飛嘅地方唔算多，坊間亦有一啲不是長期開放的場所，不過陸陸續續有非常多的競速機比賽將在香港出現。

新手學飛注意事項

第一 : 學習之路並不需要單打獨鬥，搵啲住喺你附近嘅朋友一齊飛，多一個照應係非常好嘅選擇，特別係夜晚出去飛，有人幫手留意下附近嘅情況，起碼炸機都有人知道自己跌咗去邊。

第二：如果出去練習時見到其他飛手，記得禮貌上打聲招呼及對一對頻譜（band），以免互相jam到大家或發生衝突。

第三：有唔明嘅話即管問，DNT好多人願意幫忙。

第四 : 購物前請三思，因為花多眼亂有啲嘢可能大家已經試過，冇用嘅嘢停一停、諗一諗。

第五 : 無論你部機係大機定細機，都要注意民航處嘅指引，雖然法例並未成立，但並不代表可以亂嚟。需要注意可以飛行的地方，建議望一望民航處守則。

雖然大家練習嘅機仔細細，但因應速度亦會有殺傷力。請不要胡亂飛行或做出魯莽行為，既然叫得新手，千祈唔好學人跳樓或胡亂飛出馬路、商場或人頭頂飛過。

https://www.cad.gov.hk/chine…/Unmanned_Aircraft_Systems.html

P.S.1 這篇不是廣告

P.S.2.以我所知，今個春夏將會有好多穿越機比賽及活動， 無論係參加或參觀都無任歡迎。

P.S.3. 有冇人咁好心機睇曬成篇嘢，請覆番一句。

P.S.4. 電池係一樣經常被忽略而非常非常非常重要嘅一個注意事項！如果鋰電池使用及充電不當，有機會造成危險，甚至爆炸！非常建議使用防爆袋及學識如何充放，詳情請問下同行嘅飛手。

P.S.5. My name is Sky.

【資料圖片來源：《每日頭條》2018.9.29】