想同小朋友踩單車玩平衡車又唔知去邊玩好？ 全港親子單車好去處系列為各位家長嚴選全香港所有合適一家大細一齊踩單車玩平衡車嘅好地方。

今次要同大家介紹一個大型而且景色優美嘅公園，呢個公園位於海濱長廊嘅旁邊，入面仲有艘真嘅救火船比大家參觀㗎！無錯，呢個公園就係位於港島嘅鰂魚涌公園啦！

全長640米單車徑

公園入面有一條全長640米嘅單車徑，主要以直路為主，有少少彎路，唔算太長，難度比較低，呢到好適合新手、初學嘅小朋友踩㗎！

與單車徑並列嘅緩跑徑
單車徑的側邊就係步行徑，方便家長照顧同行嘅小朋友，一邊行一邊教小朋友踩單車，可以睇實小朋友，玩都玩得安全啲啦，大家都可以係呢條緩跑徑到跑吓步架！不過呢條緩跑徑同單車徑都唔算寬、空間唔大，所以玩嘅時候記得要注意安全啊！

園內其他設施

而且單車徑嘅周圍都設有健身器材，亦有兒童遊樂場、網球場、人造草地足球場、籃球場，踩完單車都可以去玩吓其他球類活動，做多啲唔同種類嘅運動鍛鍊身體啊！家長都可以同小朋友係海濱長廊到散步，一齊吹住海風欣賞下沿路海景，放鬆吓身心。而附近亦有鰂魚涌海濱花園，風景優美，主要為步行道同埋綠化區，有一座新式建築涼亭。公園除咗有約500米嘅海濱步行道同埋花園長廊，亦有一個寵物公園，家長同小朋友有時間可以去行下。

葛量洪號救火船

鰂魚涌公園仲有一個特別之處值得大家留意﹗就係呢到有一架船架！點解嘅？其實呢艘船係叫做「葛量洪號」！以前係一艘救火船，不過已經退左役啦，所以而家開放比公眾參觀！「葛量洪號」滅火輪係1953年投入服務，係2002年退役，一直係香港消防處滅火輪隊的旗艦，曾參與無數撲救工作同埋救援任務。呢架「葛量洪號」係見證咗香港嘅消防同造船業歷史。展覽館面積約1,200平方米，展出獨特嘅消防文物，並輔以多媒體介紹，可以認識香港海上救援工作。

既然呢架「葛量洪號」咁具歷史意義，一場黎到，家長記得要帶埋小朋友一齊黎參觀呢艘咁特別嘅船啦。開放時間為上午十時至下午六時，星期二休館。

不過要記住，因為公園冇租單車服務，如果你想踩單車就要自己帶黎啦。

交通
港鐵：搭將軍澳綫於鰂魚涌站B出口行約10分鐘

地址：鰂魚涌海堤街
開放時間：24小時開放
康樂設施：每日上午7時至晚上11時
 

===

原文轉載：親子單車地圖4 之鰂魚涌公園